മലയാളികൾക്കു ചിരപരിചിതമായ വടക്കൻപാട്ടിലെ ചന്തുവിന്റെ കഥ ഈ വീരഗാഥയിൽ പുതിയ അർത്ഥം കൈവരിക്കുന്നു. ചതിയൻ ചന്തു എന്നു് അവമതിക്കപ്പെട്ടു് വടക്കൻപാട്ടിലുടനീളം ഖേദം മൌനമാക്കി ഒരു നീചജന്മം ജീവിച്ചു തീർക്കുന്ന ചന്തുവിനു് എം.ടിയിലൂടെ ലഭിച്ച പുനർജന്മമാണു് ഈ തിരക്കഥ. ഈ സിനിമക്കു ശേഷം ചന്തു ജനമനസ്സിൽ ധീരോദാത്തനായകനാണു്. വടക്കൻപാട്ടിലെ കഥാവഴികളിൽ മറഞ്ഞുകിടക്കുന്ന സത്യവും മൌനവും കണ്ടെടുത്താണു് എം.ടി. ചന്തുവിനെ പുതിയ നായകമിത്താക്കി മാറ്റുന്നതു്. തിരക്കഥയിൽ ഇതു് മലയാളത്തിന്റെ ക്ലാസ്സിക്കാണു്. സിനിമയെക്കുറിച്ചു് ചിന്തിക്കുന്നവർക്കു് എം.ടി. നൽകിയ പാഠപുസ്തകം. വായനക്കാർക്കു് ഒരു ഉത്തമസാഹിത്യരചനയും.